Vjelja e prodhimit të karrotës këshillohet të bëhet para zhvillimit të plotë të frutrrënjorit me qëlim që të shmanget forcimi i tepërt dhe drunjëzimi i zemrës, çarjet e mundshme të pjesës së jashtëme, si dhe jeshilimi i qafës. 

Mbështetur në gjatësinë e periudhës bimore të kultivarëve, vjelja mund të bëhet rreth 2.5-3 muaj pas mbjelljes, në kultivarët e hershëm me frutrrënjor të shkurtër, pas 3.5-4 muajve, në kultivarët me frutrrënjor mesatarisht të gjatë dhe të gjatë që kultivohen në vjeshtë dhe pranverë-verë dhe 4.5-6 muaj në kultivarët dimërorë.

• Për karrotat e hershme, pranohen për treg edhe ato me diametër 20-40 mm.
• Vjelja mund të bëhet me dorë ose me makineri të cilat bëjnë vetëm shkuljen e karrotës ose dhe prerjen e gjetheve, veçimin nga dheu dhe vendosjen e tyre në arka.
• Pas vjeljes karrotat transportohen në magazina ku përzgjidhen dhe ambalazhohen në arka.

Ruajtja e karrotës normalisht është e mundshme vetëm për tipet me pjekje të vonë.

Kujdes! Nuk këshillohet të lahen karrotat që janë për t’u ruajtur. Pas vjeljes dhe pastrimit, pa u larë, karrotat vendosen në ruajtje në kushte të kontrolluara, me ajrim, me temperaturë 2-3°C dhe lagështi relative ajrore 90-95 %.

Ajri i kondicionuar dhe ftohja në 0-1°C dhe lagështi 90-95%, jep rezultate më të mira.