Fara e loliumit njëvjeçar mund të prodhohet nga:

• mbjelljet e zakonshme për prodhimin e njomishtes;
• mbjellje të veçanta (të specializuara) për prodhimin e farës.

Në mbjelljet e zakonshme për prodhimin e njomishtes: rëndësi i kushtohet zgjedhjes së parcelës që do të lihet për farë. Për prodhimin e farës, zgjidhen ato parcela që kanë bimësi të shëndetshme dhe të pastra nga barërat e këqija.

Në këtë rast rëndësi ka ndërprerja e kositjeve për masë e cila për vendet e ngrohta ndërpritet dhjetëditorin e parë të muajt prill dhe për zonën e ftohtë fillimi i majit.

Masa e korrur duhet te largohet brenda 2-3 ditëve dhe menjëherë pas largimit te saj bëhet plehërimi plotësues me plehra azotike, nitrat ose ure, ne masën 40 - 46 kg/ha lende aktive.

Mbjelljet e specializuara për prodhim fare: janë më të mira dhe zbatohen parametra teknologjikë të diferencuar. Në këto raste mbani parasysh:

• Mbillet pak më vonë, 15 shtator deri 25 tetor.
• Mund të kryhet vetëm një kositje në pranverë (nuk duhet të kalojë data 10 prill) në rastet e infeksionit të lartë nga barishtet e këqija dhe kur kemi rritje të bujshme e rrëzim të bimësisë.

Korrja dhe shirja e farës
Tek loliumi njëvjeçar pjekja e farës është shumë e shpejtë. Pjekja nuk është uniforme, lastari i parë (kryesor) piqet më shpejt se të tjerët.

Kur korrja realizohet me moto-korrëse, korrja bëhet në fazën e pjekjes së qumësht - dyllit të lastarëve të parë kryesorë, ndërsa me autokombajnë korrja bëhet në fillim të pjekjes së plotë.

Shenjë dalluese për fillimin e korrjes me kombajnë është mbetja e farës në dorë nga tërheqja e kallirit ose këputja e tij gjatë kalimit në ngastër. Pra korrja fillon kur në ngastër është arritur pjekja e plotë në masën 80%.

Lagështia e farës së sapokorrur mund të jetë 40 - 50%, prandaj vëmendje e veçantë pas korrjes i kushtohet tharje së farës. Fara shtrihet (hapet), në vende të përgatitura për tharjen e farës (lëmenj të shtruar me çimento) në trashësi 10 cm dhe lëvizet herë pas herë deri sa lagështia e farës të arrijë 13 – 14%.

• Pas tharjes fara kalohet në makineri pastruese të tipit ajër/shoshë ose ndarës graviteti, më anë të cilave realizohet ndarja e pastrimi i farë nga barërat e këqija dhe farat e papjekura.
• Pas tharjes e pastrimit fara ambalazhohet në thasë dhe magazinohet në vende të thata e të ajrosura.
• Rendimenti i farës mund të jetë 4-10 kv/ha.