Jo rrallë jemi mësuar të dëgjojmë fjalët “burgu i bagëtive” për vend strehimet e kafshëve, gjë që përfaqson një mentalitet e histori lidhur me strehimin, por që gjithnjë e më shumë po tentohet të lihet pas. Pra, fermeri po kupton gjithnjë e më shumë rëndësinë që ka një strehim i qënësishëm, ku stallat duhet ti përgjigjen disa kushteve e standardeve që sjellin mbi të gjitha mirëqenien e kafshëve, kushte optimale pune si dhe kanë ndikim në prodhim, riprodhim, shëndetin e tufës dhe të ardhurat e fermës.

Por cilat janë disa nga kërkesat dhe standardet që duhen plotësuar për ndërtimin e strehimeve të përshtatshme?

Aspektet ligjore
Ndërtimi i vend strehimeve të reja si dhe ndryshimet në ndërtesat ekzistuese, bëhen duke siguruar së pari çertifikatën e pronësisë si dhe lejen e ndërtimit. Mbani parasysh se rregullorja aktuale për ndërtimet në shërbim të blegtorisë bazohet në Vendimin e Këshillit të Ministrave Nr 283, datë 01.04.2015 “Për përcaktimin e tipave, rregullave, kritereve dhe procedurave për ndërtimin e objekteve për prodhimin, ruajtjen dhe përpunimin e produkteve bujqësore dhe blegtorale, në tokë bujqësore”.

Çfarë përcaktohet në këtë Vendim?
- Ndërtimet e reja të stallave duhet të garantojnë menaxhimin e jashtëqitjeve shtazore, me filtrim paraprak.
- Stallat që mbarështojnë mbi 50 njësi gjedhi, duhet të:

• vendosen në distanca minimale me 20 metër nga kufijtë e pronës; 500 metër nga qendrat e banuara; 100 metër nga banesa më e afërt, dhe të veçuara nga qendra urbane.
• zhvillohen në një kat të vetëm, me lartësi të ndryshme në bazë të karakteristikave të veçanta teknike dhe lartësi maksimale 4.50 m.
• kenë vëllim maksimal që të mos tejkalojë intensitetin e ndërtimit prej 0.5 m³/m².
• kenë struktura për grumbullimin e jashtëqitjeve me origjinë shtazore të vendosura në distancë jo më të vogël se 100 metër.

- Stallat që mbarështojnë 10-50 njësi gjedhi, duhet të:

• vendosen në distancë minimale me 10 metër nga kufijtë e pronës; 500 metër nga qendrat e banuara; 100 metër nga banesa më e afërt, dhe të veçuara nga qendra urbane.
• zhvillohen në një kat të vetëm, me lartësi të ndryshme në bazë të karakteristikave të veçanta teknike dhe lartësi maksimale 4.50 m.
• vëllimi maksimal i objektit të mos tejkalojë intensitetin e ndërtimit prej 0.5 m³/m².
• kenë struktura për grumbullimin e jashtëqitjeve me origjinë shtazore të vendosura në distancë jo më të vogël se 100 metër.

- Stallat që mbarështojnë 5-10 njësi gjedhi, duhet të:

• ruajnë distancat minimale me 5 metër nga kufijtë e pronës; ndërsa nga banesa më e afërt 50 metër.
• zhvillohen në një kat të vetëm, me lartësi të ndryshme në bazë të karakteristikave të veçanta teknike dhe lartësi maksimale 4.50m;
• kenë vëllim maksimal të objektit që të mos tejkalojë intensitetin e ndërtimit prej 0.5 m³/m².
• të kenë struktura për grumbullimin e jashtëqitjeve me origjinë shtazore të vendosura në distancë jo më të vogël se 50 metër

Klikoni këtu në se dëshironi të dini më shumë lidhur me Procedurat për Leje Ndërtimi