Kullotat kanë një rëndësi të veçantë në të ushqyerit e deleve pasi ato plotësojnë rreth 70-80% të nevojave të tyre, duke kaluar rreth 10 orë në kullotë. Delet konsumojnë pothuajse të gjithë llojet e barërave në përbërje të një kullote, por kujdes ato janë delikate ndaj kullotave me përqindje të lartë legumesh, pasi tërfili veçanërisht tërfili i kuq dhe jonxha mund të sjellin vonesa në shfaqjen e afshit, ndaj ju rekomandojmë shfrytëzimin e kullotave të përzjera.

Një tjetër avantazh i ushqimit kryesisht në kullotë është shëndeti i kafshëve, pasi ato janë më shumë të ekspozuara në ajër të pastër dhe nën rrezet e diellit, duke ndikuar gjithashtu edhe në pjellorinë e tyre e prodhimtari. Gjithashtu, kullota përbën ushqimin më ekonomik që ju mund të përdorni për tufën tuaj. 

Cilat janë mënyrat e shfrytëzimit të kullotave?

Kullotja e lirë. Është kullotja kur kafshët qëndrojnë në gjendje të lirë gjatë të gjithë kohës në kullotë pa asnjë kufizim. Në këtë rast ato përqëndrohen në barërat më të mira duke i konsumuar dhe pothuajse zhdukur ato. Kullotja e lirë për pasojë sjell varfërimin e kullotave. 

Kullotja gjysëm e lirë. Në këtë mënyrë kullotje kafshët qarkullojnë nga njëra pjesë e kullotës në tjetrën. Ato mbahen në një pjesë të kullotës pa e shfrytëzuar atë plotësisht dhe lëvizen në pjesën tjetër të saj. Dëmtimi i kullotës është më i pakët se në rastin e kullotjes së lirë, por edhe në këtë rast dëmtohet një pjesë e bimësisë me vlerë.  

Kullotja me rotacion ose qarkullim. Përmes kësaj mënyre planifikohen pjesët e kullotës që do të shfrytëzohen si dhe koha e shfrytëzimit të tyre duke e rritur vlerën ushqyese të kullotës. Kjo mënyrë siguron periudha qetësie dhe rigjenerimi për parcelat, si dhe një shkallë të ulët infeksioni të tyre si nga parazitët ashtu edhe nga bimësia e pa dëshiruar.

Kullotja me Rotacion Intensiv

Planifikimi i kësaj mënyre kullotjeje siguron qarkullimin e tufës në kullota të mira çdo 3-7 ditë në parcela të cilat kanë një prodhimtari të lartë. Kjo mënyrë siguron dhe një kontroll të mirë të barërave të këqija.

Kullotja në rripa

Kjo mënyrë kullotje sigurohet duke i ofruar tufës çdo ditë një rrip të ri për kullotje.

Çfarë duhet të mbani parasysh për përmirësimin e kullotave?

Bashkëpunim. Bashkëpunim. Bashkëpunim. Ky duhet të jetë motivi juaj kryesor që ju sjell mirëmajtjen e kullotës, kullota më të pastra si dhe tufa më të shëndetëshme. 

Bëni kujdes për pastrimin e gurëve. Ju mund ti grumbulloni ato dhe ti përdorni si breza mbrojtës për tokën ndaj erozionit apo si prita për kontrollin e rrjedhave ujore të rrëmbyera. 

Njihni mirë bimësinë e kullotës. Pastrojini kullotat nga bimësia helmuese, barërat e këqia si dhe bimësia jo cilësore, duke i shkulur ato me kujdes dhe duke mos lejuar përhapjen e mëtejshme të farërave të tyre. Kontrolli i tyre mund të bëhet edhe përmes herbicideve pas përdorimit të të cilave duhet të bëni kujdes që të mos lëshoni tufën në kullotë për aq kohë sa përcaktohet në udhëzimet e përdorimit të herbicidit. 

Përmirësimi i bimësisë së kullotave përmes mbjelljes së farërave të bimësisë së preferuar nga dhentë në kullota. Ju mund të pasuroni kullotat duke mbjellë farëra bimësh e shkurresh cilësore dhe duke i ruajtur parcelat nga kullotja deri në rigjenerimin e plotë të tyre. 

Ndërtimi apo riparimi i lerave që mundëson pirjen e ujit aq të domosdoshëm për jetën e deleve dhe prodhimtarinë e qumështit. Lerat i japin gjallëri kullotave të pa shfrytëzuara për mungesë të ujit duke rritur potencialin kullosor dhe ruajtur energjinë e kafshëve përftuar nga kullotja.