Përse është i nevojshëm dezinfektimi në ambjentet e mbarështimit të kafshëve të fermës?

Veçanërisht në kushtet e rritjes së temperaturave, si dhe të shtimit të aktivitetit në fermat blegtorale, proceset e pastrimit dhe dezinfektimit të ambienteve të mbarështimit të kafshëve të fermës bëhen gjithnjë e më shumë të domosdoshëm. 

Procese të tilla përfshijnë pastrimin dhe dezinfektimin e stallave, të bokseve të viçave, të martenitetit, paisjeve që përdoren në fermë, si dhe mjeteve të ndryshme. Krahas tyre, vëmendje e veçantë i duhet kushtuar edhe higjienës së vetë kafshëve si dhe punonjësve të fermës. 

Pastrimi dhe dezinfektimi janë procese të rëndësishme që sigurojnë mirëqenien e kafshëve të fermës suaj, ndikojnë në rritjen e prodhimit, sigurojnë shëndetin e tyre, si dhe minimizojnë infeksionet. Higjiena e mire redukton nevojën e përdorimit të medikamenteve duke ulur edhe kostot e shpenzimeve veterinare. Procesi i pastrimit dhe ai i dezinfektimit të fermës, është kompleks dhe varet nga lloji i mikrobeve që shfaqen në fermë, lloji i sipërfaqeve dhe materiali i tyre, si dhe mënyra e pastrimit dhe dezinfektimit.

Para se të dezinfektoni ambientet e fermës,mbani parasysh se ulja e pranisë së baktereve në mjediset e fermës ul mundësinë që ato të fitojnë terren mbi kafshët dhe të shkaktojë sëmundje. Prandaj, para se të filloni proceset e pastrimit dhe dezinfektimit në stalla, ju këshillojmë të largoni nga stalla të gjitha mbetjet e jashtëqitjeve të kafshëve si dhe paisjet e lëvizshme. 

Përdorimi i solucioneve pastruese dhe dezinfektantëve duhet të bëhet në mënyrë korrekte dhe profesionale, gjë që mundëson uljen e mbetjeve të tyre në ambient dhe në produkte. Për këtë qëllim mbani parasysh:

• Ju nuk mund të dezinfektoni papastërtitë! Higjiena në vetvete përbën 98% larje, pastrim, dhe 2% dezinfektim! Mbajtja e pastërtisë së duhur në fermë është gjithnjë një praktikë më e mirë se sa dezinfektimi i papërshtatshëm, pra çdo përpjekje që bëhet për dezinfektim është jo efektive nëse ju nuk i keni pastruar më parë ambjentet apo paisjet.
• Lloji i sipërfaqeve ndikon në efiçencën e pastrimit dhe dezinfektimit, pasi sipërfaqet poroze janë më të vështira për tu pastruar dhe dezinfektuar krahasuar kjo me sipërfaqet e lëmuara. Ndaj, dezinfektantët në rastin e sipërfaqeve poroze duhet të jenë me spektër të gjerë dhe me aftësi depërtuese.
• Pas pastrimit nga jashtëqitjet për dezinfektimin e stallës mund të përdorni solucione jodi, tretësirë sode, gëlqere të shuar, gëlqere të pashuar, tretësirë fenoli.

Gjatë pastrimit dhe dezinfektimit të përgjithshëm të stallës, ju këshillojmë:

• Nëse përdorni shirita apo spango kurth për insektet, zëvendësojini ato sa herë të jetë e nevojshme.
• Kontrolloni dhe riparoni vendet e fshehjes dhe gërmimit nga brejtësit. Vendosni kurthe në përputhje me rrethanat. Pra, vëzhgoni dhe riparoni vrimat në ndërtesa për të parandaluar jetesën e brejtësve në hapsira të tilla.
• Largoni grumbullimet e dërrasave, të drurëve, ose mbeturinave të tjera.
• Kontrolloni stallën nëse ka dëmtime nga shiu apo stuhitë.
• Kontrolloni, identifikoni dhe korrigjoni problemet e shkaktuara nga rrjedhjet e plehut organik.
• Largoni nga ambientet në stallë apo përreth saj ujin e ndenjur, i cili mund të jetë një terren i përshtatshëm për rritjen e mushkonjave.

Klikoni këtu nëse dëshironi të dini më shumë lidhur me Higjienën dhe dezinfektimin në zona të veçanta.