REGJISTROHUNI KËTU për të shfletuar rubrikat e tjera të platformës.

Korrja dhe shirja është operacioni përmbyllës i prodhimit të farës. Kur 95-100% e kaptinave (quhen frutat e tërfilit), marrin ngjyrë kafe të mbyllur është koha më e përshtatshme e ndërhyrjes për korrjen dhe shirjen e farës. Korrja dhe shirja mund të bëhet:

• njëherësh, korrje e shirje direkt me autokombajnë;
• ose me dy faza, nënkupton kositjen, tharjen 2-3 ditë të masës dhe pastaj shirjen me kombajnë.

Korrja e shirja me autokombajnë ka avantazhe sepse:

• ul shpenzimet; 
• mënjanon firot e mëdha;
• kryhet për një kohë më të shkurtër, duke mënjanuar dëmtimet nga kushtet e pafavorshme të motit.

Mbas korrjes e shirjes, fara thahet e pastrohet duke e sjellë atë në standardet e kërkuara me rreth 12–13% lagështi. Vëmendje e veçantë i kushtohet pastrimit të farës nga kuskuta, ose siç quhet ndryshe dekuskutimi i farës. Pastrimi nga kuskuta realizohet me makineri të posaçme që quhet dekuskutator. Pas tharjes e pastrimit, fara e tërfilit ambalazhohet në thasë dhe ruhet e magazinuar në vende të thata e të ajrosura. Kur parametrat kryesorë të teknologjisë zbatohen, në kohë e cilësi, rendimenti i farës së tërfilit aleksandrin është 5–8 kv/ha.

Rekomandime 
Realizimi i rendimenteve të larta kushtëzohet nga:

• Afati i mbjelljes: Rekomandohet në vjeshtë 15-30 tetor, ose në pranverë herët 10-30 shkurt;
• Plehërimi bazë: me superfosfat në dozën 150 kg/ha l.a ose 15 kg/dy l.a;
• Kositja dhe lënia për farë: Kur mbillet herët në vjeshtë, mund të bëhen dy kositje, por e fundit jo më vonë se 20-25 maj;
• Korrja dhe shirja e parcelave të farës bëhet kur kaptinat marrin ngjyrë kafe të mbyllur.
• Pastrimi dhe dekuskutimi i farës është kërkesë e domosdoshme për sigurimin e materialit faror cilësor.