REGJISTROHUNI KËTU për të shfletuar rubrikat e tjera të platformës.

Sheqeri mund të përdoret te bletët në formën e sherbetit ose të kandit.

1) Sherbeti i sheqerit

• Sherbeti bazë përgatitet duke tretur në sasi të barabartë sheqer dhe ujë p.sh: 1 kg sheqer me 1litër ujë
• Sherbeti i përgatitur në këtë mënyrë, rreth 1 litër e gjysmë, përmban 50% sheqer dhe 50% ujë. Ky sherbet ka veprim stimulues në pjellorinë e mëmës

2) Sherbet 50% përdoret kryesisht në pranverë për të stimuluar familjet e bletëve, sidomos në periudha me kohë të keqe, në rastet kur bletët janë të detyruara të ndërpresin prurjen në zgjua të nektarit; 

• për të stimuluar familjet që do të përdoren për prodhimin e qumështit të mëmave ose për rritjen artificiale të tyre;
• për shtimin e familjeve të bletëve;
• për të ushqyer nukleuset e fekondimit të mëmave të reja;
• për të ushqyer shtesat e përfituara në mënyrë artificiale ose natyrale, etj.

Nëse sherbeti i sheqerit duhet të përdoret me synimin për të plotësuar rezervat ushqimore të konsumuara gjatë dimrit (menjëherë pas dimrit) ose ato para futjes së bletëve në dimër (në vjeshtë ), atëherë ai përdoret më i koncentruar, 2 pjesë sheqeri dhe 1 pjesë ujë. Sherbeti mund të përgatitet i ftohtë ose i ngrohtë. 

Kujdes! Ekziston mundësia e zhvillimit të një lloji alge të dëmshme në sherbet (që quhet Leuconostoc), prandaj ai nuk duhet lënë për shumë kohë pas përgatitjes së tij. 

Kandi 
Kandi ose “bugaçe për bletët” është një substancë ose një përzierje me përmbajtje shumë të lartë sheqeri, i cili mund të përdoret përgjatë gjithë vitit por kryesisht bëhet e domosdoshme në të ushqyerit e bletëve në fund të vjeshtës ose në fund të dimrit. Ai duke qenë së është i koncentruar mund të ruhet shumë mirë për mjaft kohë. 

Kandi mund të përgatitet në dy mënyra: 

1. duke përzierë sheqer me ujë ose,
2. duke përzierë sheqer me mjaltë.

1) Kandi i përgatitur me ujë. Vihet uji të zihet (tre litra ujë për çdo 10 kg sheqer) deri në vlim. Me fillimin e vlimit shtohet gradualisht, duke e hedhur dhe duke e përzierë, sasia e sheqerit të paracaktuar. Zjarri mbahet vazhdimisht ndezur në mënyrë të tillë që përzierja të arrijë temperaturën 115°C (në nivelin e detit). Me arritjen e kësaj temperature fiket zjarri, lihet të ftohet deri në 50°C. Me të arritur në këtë temperaturë, me ndihmën e një lopate druri përzihet deri në atë kohë sa të fillojë e të turbullohet e të vështirësohet përzierja. Në atë kohë ai zbrazet në enët e ushqimit ose në forma të ve­çanta, ose në qese plastmasi, në varësi të dëshirës së bletërritësit deri sa të marrë një konsistencë xhelatinoze, të ngjashme me atë të peltes. 

2) Kandi i përgatitur me mjaltë. Përgatitet duke e përzierë në të ftohtë 2 pjesë sheqer me 1 pjesë mjaltë të lëngshëm. Me qëllim që përzierja të jetë sa më homogjene dhe të merret me kënaqësi nga bletët, këshillohet përdorimi i sheqerit të bluar. Meqenëse çmimi i këtij të fundit është më i lartë, mund të përdoret sheqer i zakonshëm i cili duhet të bluhet më parë. Për të bërë mirë përzierjen mund të përdoren brumatriçet që përdoren në furrat e bukës, në pastiçeri ose përzierës të posaçëm për Kandi, etj. Në rastet kur duhet të përgatitet një sasi e vogël mund të bëhet me dorë duke e përzierë fort ose me ndihmën e brumatriçeve shtëpiake. 

Mënyrat e dhënies së kandit

• Kandi mund t`u jepet bletëve me anë të enëve të ushqimit ose u vendoset direkt mbi kornizat
• Në vende të ndryshme të botës disa bletërritës e përgatisin të gjithë sasinë e kandit të nevojshëm për një stinë gjatë një proçedure dhe pastaj e ruajnë atë në qese polietileni (plasmasi)
• Kandi i vendosur në këto qese ka formën e një pice të hapur
• Para përdorimit, qeseve të plastmasit u hapen vrima të vogla dhe vendosen mbi korniza në hapësirën midis kornizave dhe tavanit

Kur hapësira ndërmjet kornizave dhe tavanit është e vogël atëhere kandi mund të vendoset direkt mbi vrimën e ushqimit në dërrasën e mesme të tavanit duke e shpuar atë nga poshtë. Në këtë formë bletët ngjiten dhe e boshatisin qeskën nga brenda. Në këte rast mbi korpusin bazë të zgjoit vendoset një depo e vogël mjalti boshe pa korniza.

Cilat janë rregullat që duhen respektuar në dhënien e ushqimit nxitës të bletëve?
Gjatë dhënies së ushqimit nxitës duhen respektuar këto rregulla:

• Çdo zgjua duhet të ketë jo më pak se 5-8 kg mjaltë dhe 1-2 korniza “bukë blete” polen. Dhënia e ushqimit kur bletët kanë sasi të pakët mjalti në fole është e dobishme pasi kolonia nga mungesa e ushqimit kufizon rritjen e larvave;
• Ta gjitha llojet e ushqimeve u duhen dhënë bletëve vetëm në mbrëmje, të nesërmen para fillimit të fluturimeve të bletëve është mirë që ushqyeset të jenë boshatisur, për të mënjanuar fenomenin e “vjedhjes” në park;
• Mund të përdoret mjaltë si ushqim nxitës i marrë nga zgjoje të tjerë vetëm në rastet kur këto familje janë të shëndosha, pra kur nuk janë të prekura nga sëmundjet;
• Ushqimi nxitës i përgatitur me qumësht kur mbetet pa u ngrënë nga bletët një natë më parë nuk u jepet natën tjetër;
• Enët e ushqimit duhet të lahen mirë me ujë të vluar dhe detergjentë larës;
• Gjatë përdorimit të ushqimit nxitës të merren të gjitha masat për të shmangur fenomenin e “vjedhjes” midis bletëve;
• Kur në natyrë ka kullotë dhe zgjoi i kontrollit fillon të shtojë deri në 300 gr në ditë, bletëve u ndërpritet dhënia e ushqimit nxitës.