Një nga problemet që fermeri has gjatë kultivimit të perimeve në serrë është ushqyerja e balancuar e bimës. Në pamundësi të bërjes së analizave të tokës pas çdo sezoni nga ana e fermerit,  identifikimi i mungesave dhe tepricave të elementëve në tokë dhe realizimi i një skeme efiçente plehërimi bëhet një sfidë më vete. Më poshtë keni të paraqitur një skemë, e cila ndihmon në identifikimin e mungesave të mikro dhe makro elementëve, duke studiuar gjethen e bimës.

Çdo element është i rëndësishëm në bimë, pavarësisht nga sasia e vogël që i nevojitet bimës. Skica e mëposhtme është shembull konkret se çfarë ndodh kur mungon një element i vetëm gjatë ciklit të rritjes së bimës. 

Një faktor shumë i rëndësishëm që duhet mbajtur parasysh nga fermeri, në momentin që kërkon të plotësojë nevojat e bimës për element ushqyes është pH i tokës, i cili na tregon nëse toka është me përmbajtje acide, neutrale apo bazike. Në nivele të ndryshmë të pH, disa elementë mund të kenë vështirësi të përthithen nga bima (edhe pse ato janë prezente në tokë), dhe disa të tjera mund të arrijnë përqëndrim shumë të lartë. Siç shpjegohet edhe nga tabela e mëposhtme, kur pH është midis vlerave 6-6.5, bima arrin të përthithë në mënyrë optimale të gjithë elementët ushqyes. 

Gjithashtu, është shumë e rëndësishme të kuptohet se tepricat e njërit element ndikojnë në përthithjen e një elementi tjetër.  

Më poshtë paraqiten  disa shembuj kur tepricat e njërit element pengojnë përthithjen e elementit tjetër.

• ZINK – FOSFOR
  Nivele të larta të fosforit shkaktojnë mungesë zinku.
• ZINK – AZOT
  Nivele të larta të azotit shkaktojnë mungesë zinku.
• HEKUR – FOSFOR
  Nivele të larta të fosforit ulin aftësinë e bimës në përthithjen e hekurit.
• BAKËR – FOSFOR 
  Aplikimet në sasi të larta të fosforit ulin përqëndrimin e bakrit në gjethe.
• MOLIBDEN – SQUFUR
  Squfuri ul aftësinë e bimës në përthithjen e molibdenit.
• ZINK – MAGNEZ
  Një rritje e pH të tokës, e pasuar me përdorimin e MgCO3, shkakton shpërbërjen midis Zn dhe Mg brenda bimës dhe në tokë.
• ZINK – HEKUR
  Tepricat e zinkut çojnë në uljen e përqëndrimit të hekurit.
• HEKUR – MAGNEZ
  Sasitë e tepërta të magnezit pengojnë në përçim e hekurit nga rrënja në gjethe.
• BAKËR – HEKUR
  Përmbajtja e lartë e bakrit në raport me hekurin shkakton humbje të ngjyrës së gjethes
• BAKËR – MOLIBDEN
  Sasia e lartë e bakrit ndikon në rolin e molibdenit në bimë.
• BAKËR – ZINK
  Teprica e zinkut ndikon në defiçensën e bakrit në bimë.