REGJISTROHUNI KËTU për të shfletuar rubrikat e tjera të platformës.

Punimi i tokës

• Toka duhet punuar në thellësinë 35-40cm dhe është mirë të kryhet në vjeshtë.
• Pas këtij punimi, merren masa për ta mbrojtur tokën në kullim të plotë. Në pranverë, kryhen punime përgatitore, gjatë të cilave bëhen trajtime për luftimin e barërave të këqija.
• Punimet duhet të përfundojnë të paktën 2-3 javë para mbjelljes.
• Frezimet ose diskimet, duhet të bëhen në 4-7 ditë para mbjelljes së farës ose fidanit në të.

Kanalet kulluese dhe vaditëse
Pas punimit dhe frezimit të sipërfaqes së tokës, është e domosdoshme të përgatitet i gjithë sistemi i kanaleve kulluese dhe vaditëse.

Plehërimi i tokës

• Para punimeve të tokës duhet të shpërndahen të gjithë llojet e plehërave organike dhe ato kimike kryesisht fosforike, potasike.
• Është e domosdoshme që plehërimi të bëhet në bazë të analizave kimike të tokës.
• Vetëm atëhere bimët mund të plehërohen me kujdes pa e tepruar dhe rrjedhimisht bimët do të rriten dhe do të zhvillohen të shëndetshme.
• Për të marrë 100 kv prodhim të freskët të pjeprit, bimët kërkojnë rreth 120-140 kv plehëra organik të kalbur. Ndërsa, nga elementët kërkohen: N - 37 kg lëndë aktive; P2O5 -17 kg lëndë aktive; K2O - 63 kg lëndë aktive dhe MgO 5 - 12 kg lëndë aktive.

Sasia dhe raporti i plehërimit 

Si përcaktohet sasia e plehërave që duhen përdorur tek pjepri ? 
Duhet patur parasysh se: për të marrë 100 kv prodhim të freskët, pjepri kërkon rreth 120-140 kv pleh organik të kalbur dhe plehëra minerale: Azot (N) 37 kg lëndë aktive,  fosfor (P2O5) rreth 17 kg. Plehëra potasike rreth 63 kg lëndë aktive, Plehëra magneziale rreth 5-12 kg lëndë aktive MgO.

Për plehun organik

• Një tokë e varfër me përmbajtje humusi deri në 1.5% duhet të përdoren 300 kv/ha;
• Një tokë e mesme me përmbajtje humusi nga 1.5-3% duhet të përdoren 250 kv/ha;
• Një tokë e pasur me përmbajtje humusi mbi 3%, duhet të përdoren 200 kv/ha plehëra organike.

Plehu organik duhet të hidhet 100% në fole, ose edhe në momentin e përgatitjes së tokës.

Për elementin Azot (N)

• Për toka të varfëra me përmbajtje deri në 0.1%  azot (N), duhet të përdoren rreth 96 kg/ha lëndë aktive plehëra azotike;
• Për toka të mesme me përmbajtje deri nga 0.1-0,12% N, duhet të përdoren rreth 88 kg/ha lëndë aktive plehëra azotike;
• Për toka të pasura me përmbajtje mbi 0,12% N, duhet të përdoren rreth 70 kg/ha lëndë aktive plehëra azotike.

Për elementin Fosfor (P2O5)

• Për toka të varfëra me përmbajtje të P2O5 deri në 1 mg/100 gr tokë, duhet të përdoren rreth 39 kg lëndë aktive për ha plehëra fosforike;
• Për toka të mesme me përmbajtje të P2O5 nga 1 deri në 2 mg/100 gr tokë, duhet të përdoren rreth 26 kg lëndë aktive për ha plehëra fosforike;
• Për toka të pasura me përmbajtje të P2O5 mbi2 mg/100 gr tokë, duhet të përdoren rreth 18 kg lëndë aktive për ha plehëra fosforike.

Për elementin Potas (K2O)
Për toka të varfëra me përmbajtje të K2O deri në 8 mg/100 gr tokë, duhet të përdoren rreth 25 kg/ha lëndë aktive nga plehërat potasike. Për një rendiment deri në 200 kv/ha pjepër nga fusha dhe me mbi 8% K2O, nuk është nevoja të përdoren plehëra potasike. Nëqoftëse rendimenti parashikohet më lart se 200 kv/ha, atëhere lindin nevoja për të bërë përllogaritjet e nevojshme, dhe të përdoren plehërat sipas nevojës së përllogaritur.

Klikoni këtu nëse dëshironi të dini më shumë mbi Varietetet, mbjellja dhe kultivimi i pjeprit.