Për të evidentuar praninë e dëmtuesit në agrumishte, si dhe për të ndjekur dinamikën e populllatës, elementi më i rëndësishëm i përcaktimit të kohës së ndërhyrjes dhe i vendosjes së grackave për implementimin e metodës së kapjes masive është vendosja e ferromoneve seksuale femërore Trimedlure [t-Butyl 4 chloro - 2 methyl-cyclohexane - 1 carboxylate]. 

Ky ferromon është një tërheqës i fuqishëm për të evidentuar fluturimet e para të Mizës mesdhetare të frutave dhe garanton një program të suksesshëm monitorimi. 

 Nëpërmjet monitorimit me ferromone bëhet e mundur:

• Evidentimi sezonal i ndryshimit të dinamikës së popullatës së dëmtuesit C. capitata.
• Përcaktimi i saktë i kohës së ndërhyrjes (kimike ose me mjete alternative të kontrollit).
• Vlerësimi i efektivitetit të masave të adaptuara të kontrollit.
• Përcaktimi i species dëmtuese specifike.
• Njoftimi i kultivuesve mbi infeksionin nga dëmtuesi, përpara se ato të shëndrrohen në një problematike serioze.

Kurthet e përshtatshme për monitorimin e dëmtuesit:

• Kurthet Delta, Jackson dhe Diamond janë të përshtatshëm për t’u përdorur në zona të pastra nga pluhurat, rëra dhe ku popullata e dëmtuesit kryen lëvizje të menjëherëshme dhe të shpejta.
• Kurthet Mothercather dhe Funnel, janë të përshtatshëm për t’u përdorur në zona me ngarkesë pluhurash dhe rëre.
• Kurthet Mcphail dhe Flycatcher, janë të përshtatshëm për t’u përdorur për mizat e frutave dhe mizat e tjera.
• Kurthi Wing Trap e mbuluar me fletë plastike.
• Kurthi i modifikuar në formë gypi VARs +.

Në pjesën e poshtme të kurthit Wing Trap ndodhet një tabak ngjitës në të cilin vendoset tërheqësi dhe njëkohësisht kryhet kapja e insekteve. 

Kurthi i modifikuar në formë gypi VARs +. Përbëhet nga dy kontenierë (i sipërmi dhe i poshtmi), të cilët lidhen me njëri – tjetrin nga një gyp. Në secilin kontenier ndodhet fleta ngjitëse në formë cilindrike dhe joshësi.

• Vendosja e kurtheve: Kurthet tërheqëse për monitorim varen në degë, pothuajse në pikën më të lartë të kurorës së  pemës.
• Dendësia e kurtheve: Dy kurthe për hektarë në fusha me topografi të parregullt dhe një kurth për dy hektarë në fusha të mëdha me topografi të rregullt.
• Koha e vendosjes së kurtheve : Zakonisht fillimi i kurthimit është fillimi i majit.
• Manovrimi me joshësit: Joshësit ferromone janë mjete shumë të ndjeshme. Ato mund të shkatërrohen nga nxehtësia e lartë dhe ekspozimi në rrezatim direkt. Kapja direkt me dorë mund të shkaktojë kontaminim, i cili çon në humbje e vlefshmërisë së selektivitetit në kapje.
• Ruajtja e joshësit: Joshësit ruhen në vende të thata dhe të freskëta. Jetëgjatësia e joshësit shkon nga 3 - 36 muaj, në varësi të temperaturës së ruajtjes.
• Kapja e individëve: Përbërësi aktiv i joshësit tërheq vetëm mashkullin e mizës mesdhetare të frutave. Jetëgjatësia e kurthit në kushtet e fushës: në varësi të ngrohtësisë së motit shkon të paktën 4 - 6 javë. Pas kësaj periudhe sugjerohet zëvendësimi i joshësit me një të freskët. Kurthi i modifikuar në formë gypi VARs + është provuar se është më i miri në mesin e llojeve të kurtheve të testuar. Ky lloj kurthi mund të përdoret si për zbulimin, edhe për monitorimin e ndryshimeve sasiore të popullatës.
• Rregjistrimi i të dhënave: Është e nevojshme që kurthet për monitorim të kontrollohen një herë në javë duke filluar nga fillimi i fluturimit deri në përfundim të ciklit të zhvillimit. Vendimet për kryerjen e trajtimeve nuk duhen marrë bazuar vetëm mbi të dhënat e përftuara nga kurthet e monitorimit, por duhen marrë në konsideratë edhe kushtet klimatike dhe biologjike.

Klikoni këtu nëse dëshironi të dini më shumë mbi teknika e kapjes masive të mizës mesdhetare