Si duhet të përgatitet toka për mbjelljen e fidanëve të brokolit?

Punimi i tokës

• Toka duhet punuar në thellësinë 35-40cm. Pas të lashtave 45-50cm
• Numri i punimeve dhe i atyre përgatitore duhet të bëjnë që toka para mbjelljes të jetë e shkrifët e me strukturë.
• Punimet duhet të përfundojnë të paktën 2-3 javë para mbjelljes. Frezimet ose diskimet, duhet të bëhen në 4 - 7 ditë para mbjelljes së farës ose fidanit në të.

Kanalet kulluese dhe vaditëse
Pas punimit dhe frezimit të sipërfaqes së tokës, është e domosdoshme të përgatitet i gjithë sistemi i kanaleve kulluese dhe vaditëse.

Plehërimi i tokës

• Para punimeve të tokës duhet të shpërndahen të gjithë llojet e plehërave organike 50-70 kv/dy dhe ato kimike kryesisht fosforike, potasike.
• Është e domosdoshme që plehërimi të bëhet në bazë të analizave kimike të tokës.
• Vetëm atëhere bimët mund të plehërohen me kujdes pa e tepruar dhe rrjedhimisht bimët do të rriten dhe do të zhvillohen të shëndetshme.

Sasia dhe raporti i plehërimit 

Si përcaktohet sasia e plehërave që duhen përdorur tek brokoli? 
Për të prodhuar rreth 100 kg koka brokoli, nga toka duhet të marrin përkatësisht 1,7 : 0,07 : 2,24 kg NPK(Azot. Fosfor, Potas). Dozat e plehërimit ndryshojnë në varësi të shumë faktorëve, në radhë të parë, në varësi të kultivarëve dhe gjatësisë së periudhës së kultivimit. Përdoren;

• 20-30 kg/dynym azot(N), prej të cilave 1/3 gjatë përgatitjes së tokës për mbjellje dhe pjesa tjetër në dy duar, gjatë periudhës së formimit të “kokave”.
• Për fosforin (P2O5), janë të mjaftueshme 6-8 kg/dy P2O5.
• Potasi përdoret përgjithësisht vetëm në kultivarët e vonë dhe në tokat që përmbajnë më pak se 80 ppm kalium.
• Plehrat fosforikë dhe potasikë përdoren gjatë përgatitjes së tokës për mbjellje.

KUJDES! 
Dozat e larta të azotit vonojnë pjekjen e prodhimit. Dozat optimale të fosforit dhe potasit bëjnë të rritet prodhimi i “kokave” dhe përshpejtohet pjekja e tyre.

Cila është struktura varietore e rekomanduar?
Kultivarët e brokolit më të përshtatshëm për kultivim në vendin tonë bazuar në klasifikimin sipas hershmërisë së prodhimit, janë:

Në grupin me pjekje të hershëm: Platini F1
“Kokat” e tij mund të vilen rreth 75-80 ditë pas mbjelljesnë fushë. Eshtë i përshtatshëm për prodhime vjeshtore.

Në grupin me pjekje mesatarisht të hershëm:

• Biathlom F1
• Marathon F1
• Naxos F1
• Marathon F1

“Kokat” e tij mund të vilen rreth 85-90 ditë pas mbjelljes në fushë. Dallohet për një zhvillim të shpejtë të masës vegjetative dhe me tolerancë ndaj temperaturave të ulëta dhe atyre të  larta. Eshtë i përshtatshëm për prodhime vjeshtore.

Në grupin me pjekje të mesme:

• Parthenon F1
• Comanche F1

“Kokat” e tij mund të vilen rreth 95-100 ditë pas mbjelljes në fushë. Dallohet për një zhvillim të shpejtë të masës vegjetative dhe me koka të mëdha. “Kokat” zakonisht vinë të gatshme gjatë vjeshtës së vonë. Ato janë kompakte, të pastërta, në formë gati gjysëm sfere me ngjyrë të shkëlqyer në të gjelbërt.

Në grupin me pjekje të vonë: Spiridon F

• “Kokat” e tij mund të vilen në rreth 100-110 ditë pas mbjelljes në fushë.
• Dallohet për një zhvillim të shpejtë të masës vegjetative dhe me koka të mëdha, të cilat vijnë të gatshme gjatë  vjeshtës së vonë.
• “Kokat” janë kompakte, të pastërta, me ngjyrë në të gjelbërt. 
• Piqet njëlloj dhe mund të vilet thuajse në një dorë dhe është i qëndrueshëm ndaj kushteve të papërshtatëshme të motit.

Cila është Teknologjia e Kultivimit të Brokolit?
Teknika e prodhimit të fidanëve dhe kultivimit të brokolit në fushë shumë e ngjashme me atë të lulelakrës.

Kujtesë! 1-2 ditë para mbjelljes, bëhet paraujitja e ngastrës duke futur ujin në brazda.

Pse bëhet kjo? 

• Sepse një masë e tillë ndikon pozitivisht në koefiçencën e zënies së fidanëve
• Mbjellja bëhet sipas brazdave të hapura dhe mbillen me dorë me anë të kunjit për sipërfaqe të vogla ose me makinë mbjellëse fidanash.
• Pas mbjelljes bëhet ujitja për zënje e kështu synohet të mbahet një regjim lagështire të mjaftueshme në tokë.
• Pas 4-5 ditëve bëhet kontrolli për zënje dhe bëhen zëvendësimet e nevojshme.
• Mbjellja e fidanëve duhet të bëhet herët në mëngjes ose pasdite vonë në orët më pak të nxehta të ditës.

Cilat distanca mbjelljeje zbatohen për brokolin në fushë?

• Për Kultivarët e hershëm 70x40 cm.. (3.6 bimë/m2 ).
• Për kultivarët e mesëm 70 x 50 cm.. (2.9 bimë/m2 ).
• Për kultivarët e vonë 70 x 60 cm (2.4 bimë/m2 ).

Kujdes! Brokoli kërkon lagështirë konstante të tokës. Përllogaritet se nga mbjellja e deri në fillimin e formimit të kokës i duhen çdo ditë rreth 4,5 mm ujë, ndërsa gjatë formimit të kokave i duhen rreth 6,5 mm ujë në ditë. 

Çfarë shërbimesh agroteknike kryhen për brokolin?

• Shërbimet agroteknike për brokolin konsistojnë në ujitjet, prashitjet dhe plehërimet plotësuese.
• Ujitjet në vegjetacion bëhen sipas nevojave, zakonisht në çdo 15-20 ditë.

Kujdes! 
Gjatë ujitjeve duhet që në ngastër të mos krijohen pellgje e vatra ujëmbajtëse, ndërsa gjatë vjeshtës dhe dimrit duhet të mbahet në gadishmëri të plotë sistemi i kullimit. Kujdes i veçantë i duhet kushtuarshkriftërimit të tokave dhe luftimit të barërave të këqia. Plehërimet gjatë periudhës bimore kryhen me kujdes, në kohë e pa teprime.

Plehërimet azotike përdoren në 2-3 duar;

• E para në prashitjen 7-8 ditë mbas mbjelljes së fidanit.
• E dyta 15-20 ditë pas të parës.
• E treta një muaj më vonë.

Zakonisht lule lakrave pasdimërore nuk u jepet azot para hyrjes në dimër, por u jepet një dorë e rëndë, gjatë shkurt marsit. Nevojat më të mëdha për plehërimin potasik, brokoli i ka gjatë diferencimit të “kokave”. Masë teknike me interes dhe rëndësi është mbathja e bimëve të brokolit mbas mbjelljes së fidanëve në fushë dhe rrënjëzimit të tyre.

Klikoni këtu nëse dëshironi të dini më shumë mbi Sëmundjet e brokolit, parandalimin dhe luftimin e tyre.