Format e kultivimit (format e mbajtjes së kurorës) te molla mund të jenë: 

• Të detyruara 
• Te lira

Të detyruara ku përfshihen format: 

• spaliere ose kordon (d.m.th. me shtrirje horizontale të krahëve në sistemin mbështetës)
• Palmetë dhe aksiale

Në format e detyruara janë edhe sisteme të tjera si ato konike, boshtore, aksiale, etj. Forma të lira ku përfshihen:  

• piramidale (d.m.th. lihet një udhëheqës qendrorë dhe vishet me degë  skeletore në kate)
• kupore (me 3 – 4 degë skeletore)

Në formën e lirë piramidale  përfshihen edhe forma të tjera kultivimi si: piramidale me kate të përmirësuara, piramidale me aks të lirë, kordon vertikal apo i pjerrët, kordon i ngushte apo i gjerë, e shumë të tjera. 

Procedura e formimit të kurorës kordon dhe palmetë
Formimi i kurorës realizohet nëpërmjet krasitjes formuese. Në vitin e parë, procedura është e njëjtë për të dy format. 

• Kërcelli kryesor pritet në lartësinë 50 cm nga toka.
• Gjatë verës zgjidhen 3 lastarët më të mirë (për formimin e katit të parë të palmetës apo kordonit).

Kujdes! Lastarët e tjerë, në këtë lartësi, nuk këshillohen të hiqen, por të pincohen me qëllim që të mos ulet sipërfaqja foto sintetike, e cila do të ndihmojë në fuqizimin e sistemit rrënjor dhe të bimës në përgjithësi. 

• Hiqen të gjithë degët që dalin poshtë degëve të para skeletore (me qëllim që trungu i ardhshëm të rritet pa plagë dhe deformime i drejtë dhe i lëmuar).
• Hiqen të gjithë degët që dalin (ndodhen) në pozicione të pafavorshme.

Si veprohet më tej për krijimin e formës Kordon dhe Palmetë?
Për krijimin e  formës kordon  dy lastarët e parë shtrihen horizontalisht dhe lidhen nëpër tela. Ndërsa për krijimin e formës palmetë lastarët lidhen me pjerrësinë e duhur 45-60 gradë. Në të dy rastet lastarët pincohen me qëllim stimulimin e diferencimit të sythave vegjetative dhe shpërthimin e lastarëve të rinj që do të jenë dhe degëzat e ardhshme të cilat do të shërbejnë për formimin e degëzave dhe diferencimin e sythave frutore. 

Lastari më  në majë lihet i lirë dhe drejtohet me anë të një huri/kallami mbështetës vertikalisht drejtë ose lidhet me telin kur është vendosur sistemi mbështetës. Kështu kemi krijuar katin e parë të kordonit apo palmetës. 

Gjatë krasitjes dimërore ky i fundit (lastari i lënë drejt si udhëheqës) pritet përsëri në lartësinë 50 cm. Nga lastarët që shpërthejnë përzgjidhen (ashtu si për katin e parë) edhe 3 lastarë të tjerë për formimin e katit të dytë të spalierës (kordonit) apo të palmetës. Pra ndryshim në mes të dy formave është vetëm tek pozicionimi i degëve skeletore, tek forma kordon ato shtrihen në kënd të drejtë kurse tek forma palmetë pozicionohen në kënd 45 – 60 gradë.

Klikoni këtu nëse dëshironi të dini më shumë për Krasitjen tek molla