Cila është struktura varietore e rekomanduar? 
Sipas përdorimit dallohen dy lloje selinoje: Duke u bazuar në periudhën e kultivimit, ato ndahen në:

• Kultivarë për prodhim bishta gjethesh dhe gjethe.
  Midis kultivarëve për bishta e gjethe më i përhapur është “Vert d’Elne”, që formon bishta gjethor mishtor të shijshëm të mbledhur në formë tufe dhe gjethe aromatike. Rendimenti mund të arrijë 25-40 kv/dyn. Mund të kultivohen me sukses edhe kultivarë të tjerë si “Loret”, mesatarisht i hershëm me masë gjethore të gjelbër të hapur dhe kërcej të bardhë, i përshtatshëm për prodhim të hershëm; 
  Kultivari “Claret”, mesatarisht i vonë, me masë gjethore dhe kërcej të gjelbër të errët e që dallohen për prodhimtari të lartë.
• Kultivarë për frutrrënjorë. Më i përhapur është kultivari “Mentor”, që formon frutrrënjor të madh, të bardhë, mishtor e me përmbajtje të ulët fibre. Përshtatet për konsum të freskët dhe përpunim.

REKOMANDIM! FERMERI QË VENDOS TË MBJELLË SELINO, DUHET TË KETË PARASYSH KËTA VEÇORI TË SAJ:

• Për shkak të vështirësive që ka gjatë procesit të mbirjes, selinoja pothuajse nuk mbillet asnjëherë drejtpërdrejt me farë, por me fidanë të parapërgatitur.
• Selinoja është mjaft tolerante ndaj kripëzimit të tokës.

Cila është Teknologjia e Kultivimit të Selinos?
Në varësi të periudhës së kultivimit, fidanat mund të prodhohen në farishte të hapura, në sera me tava polisteroli. Për një dynym selino nevoiten 10-15 m² farishte. Sasia e farës së nevojshme është rreth 2 g/m² farishte. 

Në çastin e mbjelljes në vendin e përhershëm fidani duhet të jetë i plotë dhe me gjatësi 15-20 cm. Për përgatitjen e fidanëve nevojiten 60-80 ditë.

Cilët afate mbjelljeje rekomandohen në fushë?
Selinoja mund të kultivohet gjatë pranverës ose në periudhën vjeshtë-dimër. Për të marrë prodhim në verë-vjeshtë, fara mbillet në muajin mars-prill dhe fidanët në fushë në maj-qershor.

Për të marrë prodhim në periudhën nga fundi i tetorit, deri në fund të prillit, në varësi të kushteve klimatike të zonës, fara mbillet dora dorës, duke filluar në fund të prillit e në vazhdim, deri në qershor. 

Sa duhet të jenë distancat e mbjelljes?
Mbjellja në vendin e përhershëm të fidanëve të selinos bëhet me rreshta. Largësia midis rreshtave, në varësi të masës bimore të kultivarëve të përdorur, luhatet nga 30 deri në 60 cm dhe largësia midis bimëve në rresht 20 cm.

Çfarë shërbimesh agroteknike kryhen për selinon në fushë?
Shërbimet agroteknike më të rëndësishme për selinon janë:

• Plehërimi i bimëve në rresht.
• Ujitjet sipas nevojave.
• Mbathja e bimëve shumë e rëndësishme për të marrë kërcej(bishta gjetheje) të gjatë e të zbardhur.
• Luftimi i barërave të këqija 

Barërat e këqija mund të luftohen me prashitje ose me trajtime kimike para mbjelljes, dhe herbicidi duhet të përmbyset gjatë përgatitjes së tokës ose dy-tre javë pas mbjelljes së fidanëve në fushë.

CILAT JANË SËMUNDJET DHE DËMTUESIT E SELINOS NË FUSHË TË HAPUR?
Selino në përgjithësi, preket nga pak sëmundje dhe dëmtues si mozaiku, kërmijtë etj.

Pse përbëjnë problem sëmundjet dhe dëmtuesit ?

• Shkaktojnë ulje të ndjeshme të prodhimit.
• Ulet vlera tregtare.
• Ulen të ardhurat për njësi prodhimi

Parandalimi i sëmundjeve dhe dëmtuesve të selinos
Për të shmangur shfaqjen e sëmundjeve dhe dëmtuesve, si dhe për të patur prodhim sa më pastër të bishtave të gjetheve të selinos duke eleminuar ose minimizuar përdorimin e preparative kimike, rekomandohen masat e mëposhtme parandaluese:

1. Zbatoni teknika të mira kultivimi, ushqim të ballancuar, heqjen e barërave të këqija.
2. Kontrolloni sëmundjet e shfaqura në kohën e duhur dhe hiqni bimët e dëmtuara në mënyrë që të mos infektoni bimët e tjera.
3. Zbatoni qarkullimin bujqësor. Mos mbillni selinon pas kulturave si kopër, karrota, majdanoz.
   Kungulli, domatja, patatja, qepa dhe lakra janë parabimë shumë të mira për selinon. Pas vehtes selino mbillet pas 4 vjetëve.
4. Zgjidhni varietete rezistente ndaj sëmundjeve për mbjellje.
5. Rrallimi i bimëve në mënyrë që bimët të mos hijezojnë njëra-tjetrën. Mbillni pranë ngastrës së selinos bimë si hudhër, qepë, nenexhik, borzilok, aroma e të cilave largon dëmtuesit e selinos.

VJELJA, PËRPUNIMI DHE RUAJTJA E PRODHIMIT TË SELINOS

Periudha bimore, në mbjelljet verore, me farë, ndryshon nga 80 ditë për kultivarët e hershëm, 120 ditë për të mesmit dhe 180-220 ditë për ato të vonët.

Vjelja e selinos kryhet në një hark kohor mjaft të gjerë në varësi të karakteristikave të kultivarëve, periudhës së kultivimit dhe kërkesave të tregut;

• Bimët e selinos për gjethe vilen me dorë, u pritet rrënja nën qafën e rozetës gjethore dhe pastaj pastrohet nga gjethet e dëmtuara. Lidhen në tufa me 3-5 bimë dhe dërgohen në treg.
• Për selinon rrënjë, vjelja shoqërohet me pastrim të rrënjëve dhe shkurtim të masës gjethore.

Në kushte optimale, selino mund të ruhet deri në shtatë javë në temperaturë 0-2°C.