Kunbulla preket nga një serë sëmundjesh dhe dëmtuesish të cilat ndikojnë ndjeshëm në përkeqësimin e shëndetit të bimës dhe uljen e cilësisë dhe sasisë së prodhimit.

Sëmundjet e kumbullës
Njollosja e kuqe e gjetheve 

Simptomat: Në gjethet e reja të kumbullës paraqitet një numër i madh i njollave të përmasave të ndryshme. Në fillim njollat janë me ngjyrë të verdhë të cilat më pas marrin ngjyrë portokalli dhe në fund ngjyrë të kuqe të mbyllët. Gjethet e infektuara rëndë, gjatë muajit gusht dhe shtator, bien në tokë para kohe. Kur temperatura dhe lagështia janë të favorshme për zhvillimin e sëmundjes infeksioni është shumë i madh.

Për shkak të rënies së parakohshme të gjetheve frutat ngecin në rritje, kanë shije acide (për shkak të sasirave jo të mjaftueshme të sheqerit) bien në tokë dhe nuk mund të përdoren as për përpunim.

Masat e luftimit
Menjëherë pas lulëzimit është e nevojshme të spërkatet kumbulla me njërin nga këto preparate kimike: Cineb-80, Venturin S-50, Ditane 70, Mankogal-65, Folpet-50 etj. Trajtimin e kumbullës me fungicide duhet përsëritur së paku 2-3 herë me intervale prej 12-15 ditëve me njërin nga preparatet e lartpërmendura.

Ndryshku i kumbullës (Puccinia pruni-spinosae)

Simptomat e sëmundjes paraqiten në gjethe në formë të njollave të imëta me formë eliptike, të madhësisë rreth 1-2 mm të cilat kanë ngjyrë të verdhë. Në anën e poshtme  të gjethit shfaqen njolla të ngritura të rrumbullakëta ngjyrë ndryshku. Këto njolla paraqesin organet e riprodhimit të patogjenit të cilat barten përmes erës dhe shkaktojnë infeksionet në gjethet e shëndosha.

• Kjo sëmundje e prek kumbullën zakonisht gjatë muajit korrik kur kumbulla është në vegjetacion të plotë.
• Gjethet e infektuara kanë intensitet më të ulët të proceseve të asimilimit dhe shpesh herë bien para kohe. Frutat ngelin të pa pjekura,  me ngjyrë të kuqrremtë, kanë përmbajtje të ulët të sheqerit dhe janë shumë të papërshtatshëm për përpunim.

Masat e luftimit
Pengimi i paraqitjes së infeksioneve primare dhe përhapja e sëmundjes gjatë vegjetacionit me sukses mundë të bëhet përmes spërkatjes së kumbullës me ndonjërin prej këtyre preparateve kimike: Ciram S-75, Cineb S-65, Folpet EP-50, Bayleton EC-125, si dhe të gjitha preparatet (fungicidet) të cilat si lëndë aktive kanë bakrin.

Virusi i mozaikut të kumbullës (Plum pox virus)

• Sëmundja prek si gjethet ashtu edhe frutat e kumbullës.
• Simptomat: Në gjethe zakonisht paraqiten njolla unazore me ngjyrë të gjelbër por edhe njolla mozaiku. Madhësia e këtyre njollave sillet prej 2-3 mm e në disa raste te infeksionet e rënda edhe deri 10 mm.
• Në fruta simptomat janë shumë të dukshëm në kohën e pjekjes së frutave. Në këtë kohë  në fruta paraqiten njolla karakteristike me ngjyrë të kaltër të mbyllët dhe në sipërfaqe të frutave formohen deformime të formave të ndryshme.
• Virusi bartet nga pemët e infektuar te ato të shëndosha përmes shartimit dhe përmes insekteve. Nga insektet morrat e bimëve janë vektorët më të rrezikshëm të përhapjes së virusit dhe në këtë drejtim më i njohuri është morri i gjelbër i pjeshkës.
• Frutat e infektuar janë pa shije, me aromë të keqe, bërthama vështirë ndahet nga tuli i frutave, piqen më herët por edhe shumë prej tyre bijnë në tokë para kohe. Frutat e infektuar po ashtu kanë tul me ngjyrë të verdhë të mbyllët apo të kuqërremtë dhe praktikisht janë të pa përdorshëm.

Masat e luftimit
Masa efikase për mbrojtjen efikase të kumbullës nga virusi praktikisht nuk ekzistojnë. Përkundër kësaj në praktikë për parandalimin e paraqitjes dhe përhapjes së sëmundjes virusale rekomandohet përdormi i materialit fidanor të shëndoshë, kultivimi i varieteteve të qëndrueshëm ndaj virusit, luftimi i morrave të bimëve si vektor të sëmundjes, etj.

Sëmundje tjera të kumbullës por me intensitet më të vogël janë:

• Gjethebiruesja e kumbullës (Phyllosticta prunicola),
• Kalbëzimi i frutave të kumbullës (Monilia laxa), etj.

Dëmtuesit e kumbullës
Krimbi i kumbullës ose Mola e kumbullës (Grapholita funebrana)

Insekti i rritur është flutur, krahëhapur ka madhësi rreth 15 mm, me trup ngjyrë të hirtë kafeje. Dimëron në vende të ndryshme, në të çarat e degëzave dhe të trupit të kumbullës. Insektet e rritura shfaqen herët  në pranverë në mujin prill dhe maj. Krimbi i kumbullës formon 2 e rrallë herë 3 brezni brenda vitit. Fluturat e breznisë së parë vezët e tyre i depozitojnë në frutat e porsaformuara apo në gjethet afër frutave, ndërsa ato të breznisë së dytë në frutat e kumbullës.

Dëmet i shkaktojnë vemjet të cilat, menjëherë sapo të çelin, futen në brendi të frutave ku ushqehen me tulin e tyre. Si rezultat i prekjes së tyre frutat ngecin në rritje, marrin ngjyrë trëndafili dhe rrëzohen në tokë. Vemjet në frutat e rëna në tokë vazhdojnë zhvillimin e tyre dhe më pas dalin insektet e rritura. Femrat e breznisë së re vezët i depozitojnë në fruta dhe secila prej tyre pjell deri 40 vezë, që do të thotë se një flutur prek dhe dëmton afërsisht 40 fruta. Frutat e prekura, sidomos ato të kultivarëve të vonshëm, pothuajse nuk kanë vlerë tregtare nga dëmet e këtij dëmtuesi.

Masat e luftimit

• Masa më e rëndësishme, për shkatërrimin e vemjeve të cilat dimërojnë, është apërkatja dimërore e kumbullës. 
• Fluturat e breznisë së parë shfaqen në fazën e formmit të frutave. Prandaj rekomandojmë trajtimin e kumbullave para depërtimit të vemjes në brendi të frutit, në fazën e rënjes së petlave dhe lidhjes se frutave. Gjatë vegjetacionit përdoren këto preparate: Talstar 10 EC, Basudin 40 ËP, Fenitrotion 50 EC, Karate 2,5 EC, Sumicidin EC-20, Ultracid 40 EC si dhe preparate tjera me veprim kontakti dhe sistemi.

Grerëzat e kumbullës (Hoplocampa minuta dhe Hoplocampa flava)

• Ekzistojnë shumë lloje të grerëzave të cilat dallohen në mes tyre për nga ngjyra dhe madhësia trupore e tyre. Insekti i rritur i grerëzës së zezë të kumbullës ka madhësi rreth 4-5 mm me ngjyrë të zezë trupore. Grerëza e verdhë e kumbullës ka ngjyrë të verdhë në të kaftë dhe madhësi rreth 7-9 mm. 
• Karakteristikë për dy llojet e grerëzave është se jetojnë dhe zhvillohen në brendi të frutave të kumbullës, dimërojnë në tokë dhe  formojnë nga një brezni brenda vitit.
• Insektet e rritura shfaqen në kohën e hapjes së sythave frutorë të cilat depozitojnë vezët në kurorë të luleve. Nga vezët çelin larvat të cilat depërtojnë në fruta dhe shkojnë deri te farat e frutave me të cilat ushqehen. Kur larva të arrijë zhvillimin e saj të plotë del nga fruti dhe lëshohet në tokë ku nimfëzohet dhe dimëron si e tillë. Një numër mjaft i madh i larvave arrijnë në tokë me anë të frutave të rënë në tokë.
• Grerëzat e kumbullës paraqesin dëmtuesit më të rrezikshëm të kumbullës në vendin tonë. Një larvë mund të dëmtoj 4-5 fruta që praktikisht do të thotë se nëse në 20 % të luleve të jetë depozituar nga një vezë mund të llogaritet në humbjen e të gjitha frutave në kumbull.

Masat e luftimit

• Spërkatja dimërore me qëllim të eliminimit të potencialit infektues të këtij dëmtuesi Rekomandohet të bëhet spërkatja dimërore ose herët në pranverë para fillimit të vegjetacionit me qëllim eleminimin  me këto Insekticidet e rekomandura për trajtimin dimëror janë:  Galpar, Galmin, Frutapon, etj.
• Edhe te këta dëmtues duhet aplikuar preparatet kimike para se të kenë depërtuar larvat në brendi të frutave përndryshe preparatet e aplikuara nuk do të japin efektet e pritura. Nga preparatet kimike rekomandohen: Talstar 10 EC, Malation, Folimat, Fastak, Lebaycid, Ultracid, Gusation, Dimekron, etj.

Breshkëza e kumbullës

Insekti i rritur ka trup të mbuluar me mburojë ngjyrë kafeje, dhe gjatësi trupore 2-6 mm. Larvat e reja nuk kanë mburojë dhe kanë madhësi rreth 1 mm me ngjyrë të verdhë. Larvat kalojnë nëpër shumë faza të rritjes. Dimërojnë në fazën e larvës në lëvore të trupit të kumbullës. 

• Në pranverë femrat e rritura depozitojnë deri 2000 vezë nga të cilat në muajin prill çelin larvat e reja. Brenda vitit formon një brezni.
• Aftësia për tu shumuar shpejt tregojnë se dëmet nga ky dëmtues mund të jenë shumë të mëdha për kumbullën. Insektet e rritura dhe larvat me aparatin gojorë shpues - thithës nxjerrin lëngjet bimore nga pjesët e ndryshme të kumbullës. Në rastin e prekjes së kumbullës nga ky dëmtues  thahen degëzat dhe degët e kumbullës dhe nëse sulmi vazhdon më tej kumbulla shkatërrohet në tërësi.

Masat e luftimit
Spërkatja dimërore jep rezultate të mira në luftimin e këtij dëmtuesi. Në këtë kohë përdoren këto preparate kimike: Oleometion 100 EC, Galmin, Kreozan, Galpar etj. Kurse gjatë vegjetacionit përdoren preparatet me veprim sistemi: Rogor, Anthio, Metasistox, Decis etj.

Dëmtuesit e tjerë të cilët prekin kumbullën por me intensitet më të vogël janë:

• Morri i gjelbër i kumbullës (Hyalopterus arundinis)
• Merimanga e kumbullës (Eriophyes phloeocoptes), etj.

Klikoni këtu nëse dëshironi të dini më shumë për Vjeljen e prodhimit të Kumbullës