Vendorigjina e bamjes është India. Në vendin tonë bamja ka hyrë në periudhën e perandorisë osmane.  Kjo bimë i është përshtatur shumë mirë klimës së vendeve të Mesdheut dhe kultivohet me sukses në këto zona. Shkon mirë si në zonat fushore, ashtu edhe në zonat malore të Shqipërisë duke u mbjellë në sipërfaqe rreth 800 ha me rendiment mesatar70 kv/ha.

Përse bamja ka gjetur përhapje  në vendin tonë? Kjo sepse:

• Frutat e kësaj bime po gjejnë përdorim gjithmonë e më shumë në kuzhinat tona për vlerat ushqimore që ka dhe përdorimin e saj gjatë gjithë vitit, dhe konsumohen si gjellë në formë të freskët, por edhe të thata.
• Ka vlera të mira dietikedhe në kurimin e disa sëmundjeve si ato reuzmatike dhe të sistemit të tretjes, pasiprania e celulozës në përmbajtje relativisht të lartë, ndikon në rritjen e aktivitetit të peristaltikes së zorrëve. Përmbajtja e lëndëve ushqyese në frutet e kësaj bime janë: lëndë e thatë 11-15%, proteinë 2,6 - 3 %, celulozë 85,6-88,4%.
• Vendi ynë ka kushte shumë të përshtatshme klimatiko-tokësore për kultivimin e bamjes, sidomos vendet e ulëta dhe bregdetare.
• Bamja ka aftësi të mira prodhuese dhe efektivitet ekonomik, fermeri siguron të ardhura të kënaqshme.

Cilat janë kërkesat e bamjes për klimën, tokën dhe parabimën?
Bamja është bimë e klimës së ngrohtë. 

• Temperatura optimale e mbirjes është 18-24°C
• Fara mbin për 10 - 12 ditë në temperaturën 15°C
• Temperatura më e lartë biologjike është 32°C

REKOMANDIM! 
FERMERI QË VENDOS TË MBJELLË BAMJE, DUHET TË KETË PARASYSH KËTO VEÇORI TË SAJ: 
a) Temperatura minimale e rritjesë shtë deri në 8°C. 
b) Temperaturat më të larta se 32°C mund të shkaktojnë mospllenimin dhe rrëzimin e luleve duke dëmtuar rëndë prodhimin. 

Bamja është bimë ujëdashëse.
Nevojat më të mëdha janë në fazat e parë të rritjes, sepse gjatë kësaj periudhe vazhdon rritja intensive e sistemit rrënjor. Por kjo nuk do të thotë qënë fazat e mëvonshme kjo bimë të mos  ketë më nevojë, sepse mungesa e ujit bën që të pengohet lidhja e frutave të reja dhe frutet e porsa lidhura të drunjëzohen dhe të prishin cilësitë tregëtare. Prandaj prania e ujit në tokë është domosdoshmëri gjatë gjithë jetës së saj.

Në cilat toka shkon më mirë bamja?
Bamja është bimë shumë kërkuese ndaj tokës, parapëlqen toka mesatarisht të lehta, të thella, të pasura me lëndë organike, të freskëta, të kulluara mirë me ph 6-7. Nuk pëlqehen tokat e rënda, të lagëta dhe të ftohta, pasi në fazat e para të jetës nuk i rezistojnë kytyre disfavoreve. Bamja është mjaft tolerante ndaj kripëzimit të tokës.

Cilët nga parabimët i përshtaten më shumë bamjes? 
Ndaj qarkullimit të tokës, bamja nuk ka kërkesa të veçanta, përkundrazi kultivimi në të njëjtën tokë për disa vite me radhë, nuk e ul rendimentin e bamjes, por me një të metë që e varfëron shumë tokën. Kjo për arsye se përveç largimit të lëndëve ushqyese nëpërmjet frutifikimit, një sasi e konsiderueshme e lëndëve ushqyese, shkojnë në formimin e sistemit bimor dhe rrënjor, të cilat kjo bimë i merr me përmasa të mëdha dhe që në fund të vegjetacionit hidhen jashtë parcelës duke krijuar një defiçit të ndjeshëm të lëndëve ushqyese.

Për këtë arsye bamja të mbillet pas graminoreve dhe është mirë që të rikthehet në të njëjtën ngastër, jo më parë se 3-4 vjet.

Klikoni këtu në se dëshironi të dini më shumë për si duhet të përgatitet toka për mbjelljen e bamjes