Pse  ka rendësi momenti i vjeljes së rrushit të tavolinës?
Përcaktimi i shkallës së pjekjes dhe vjelja e rrushit në momentin më të përshtatshëm, janë operacione vendimtare për cilësinë dhe vlerën tregtare të prodhimit.

Mbani parasysh: Frutat e rrushit të papjekura mirë, mbas shkëputjes nga hardhia, nuk e vazhdojnë procesin e pjekjes sikurse disa pemë tjera frutore. Vjelja para kohe ul cilësinë e rrushit, kurse vonesa në vjelje ul aftësinë e ruajtjes gjatë.

Kur duhet të filloj vjelja?
Vjelja duhet të filloj kur fruta ka arritur karakteristikat kryesore të varietetit si: ngjyra e varietetit, shija, aroma, përqindja e sheqerit  dhe niveli i aciditetit në kokërr.

Përqindja e sheqerit në kokërr: Kultivarët e rrushi të tavolinës janë të pranueshëm në treg kur ato kanë grumbulluar të paktën 14% sheqer dhe të kenë aciditet jo më të lartë se 7 – 8 g/l (i shprehur në acid tartrik). Preferohet të vilet kur ai ka 15 – 16% sheqer dhe aciditet jo më të lartë se 6 g/l acid tartrik.

Për kultivarët me pjekje shumë të hershëm (Perla di Ksaba, Mbretëresha e Vreshtave, Kardinal, Bllak - Mexhik, Viktoria, Matilda, etj.) vjelja mund të bëhet edhe atëherë kur përmbajtja e sheqerit është në vlera të ulëta (14%). Ndërsa  kultivarët me pjekje të mesme ose të vonë (Afuzali, Italia, Muskat Hamburgu, Muskat i Aleksandrise, Alfons, Lavalle, etj.) duhet të vilen në fazën kur në kokërr  të jetë grumbulluar vlera më e  lartë e sheqerit.

Për të përcaktuar përmbajtjen e sheqerit, shijen dhe aromën shijoje atë. 
Për një përcaktim më të saktë të përqindjes së sheqerit në kokërr përdor  refraktometër ose bëj analizat kimike të kokrrës. 

Koha e vjeljes dhe ambalazhimi

• Vjelja nuk bëhet në vesë dhe kur bie shi sepse kokrrat e rrushit thithin një sasi lagështie dhe në to ulet përmbajtja e sheqerit.
• Rrushi i tavolinës vilet me shumë kujdes duke e kapur vetëm prej bishtit kryesor dhe duke e prerë bishtin me gërshërë. Vendosja e veshulëve bëhet në arka të cekëta me kapacitet jo më të madh se 10 kg.
• Veshulët në arka vihen me bishta sipër (gjatë vjeljes).     
• Pas vjeljes bëhet seleksionimi i tij.